Ndabishoboye, album ya Gatatu ya Mc Fab aratangazako izaza ari ikosora muri muzika nyarwanda.

by Venuste Kamanzi

Hano mu Rwanda ukunze gusanga umuntu ashyira ku mugaragaro album ariko abantu bayishaka ntibayibone ku isoko, wanajya mu birori byo kuyishyira ku mugaragaro ukibaza niba indirimbo ari ize cyangwa arimo kwigana (interpreter)  izitari ize kimwe n’uko wazana undi wese akabikora, ariko njye nzabereka ubushobozi bwange kandi nkosore iyo sura itarinziza, aya ni amagambo twatangarijwe na Mc Fab.

Uyu muhanzi wahoze mu muryango w’Abacoga (abatangije coga style), yamenyekanye cyane mu ndirimbo Imbabura yanitiriwe Album ye ya Kabiri, amaze gushyira ku mugaragaro album ebyiri no muntangiriro z’umwaka wa 2012 akazazana indi ya gatatu.

Aganira na ihorere.blogspot.com yagitangarije ko n’ubwo ngo akazi ke kaba katamworoheye arimo gukora imyitozo myinshi hamwe n’abazamucurangira n’abazamubyinira kuko yifuza kuzakora ibintu bijyanye n’igihe kandi bigezweho, Fab yizerako bizagera ku munsi nyawo byose byaragiye ku murongo kuko yabitangiye hakiri kare.

Mc Fab yemezako Ndabishoboye album izazana agashya katari gasanzwe mu Rwanda kuko izasohoka mu majwi n’amashusho kandi y’indirimbo zose zizaba ziyigize.

Yakomeje avuga ko bimwe mubizakosora ishyirwa ku mugaragaro ry’ama album hano mu Rwanda bikiri ibanga, Ati “ Ariko hari ibyo ntakwihererana nk’uburyo nzaba ngaragiwe n’abacuranzi n’ababyinnyi dukora muzika ikinwe ako kanya kandi yuzuye (Full Live) kandi icyo gihe abazaba bahari bazaba banerekwa amashusho y’indirimbo zange zose, numva bizabera ahantu hiyubashye kuko nzashaka hoteli imwe hano mu mujyi wa Kigali nkaba ariho ibyo birori bibera, mu gihe nzaba ndirimba hazaba harimo kugaragazwa n’amashusho yazo.

Fab yemezako mu rwego rwo kongerera agaciro iyi album no kurushaho kuyiryoshya yagiye afatanya zimwe mu ndirimbo ziyigize n’abahanzi benshi bo mu Rwanda Tom Close, Dream Boys, Riderman n’abo hanze, harimo Bindimo indirimbo yitiriwe album yafatanijemo n’itsinda rya Just Family kandi ngo yizeye ko izashimisha Abanyarwanda.

Mc Fab bakunze kwita Imbabura yasabye abafana ba muzika nyarwanda gutega amaso iyi album ye nshya, ati” Ubundi nayihaye akabyiniriro k’IKOSORA album kuko nshaka kwereka Abanyarwanda album icyo aricyo kandi yuzuje ibyangombwa byose , icyo mbasaba gusa bambe hafi kuko inama zabo nazo zirakene kugirango ndusheho kuzabazanira ibintu byiza.