Ubutumwa bw’abakunzi ba muzika kuri Tom Close mbere y’uko akorana indirimbo na Sean Kingston

Muri iki gihe abakunzi ba muzika bategererezanije amatsi menshi indirimbo uwatsindiye Primus Guma Guma Super Star (PGGSS) ariwe Tom Close, azakorana n’umuhanzi ukomeye ku isi yose Sean Kingston nka kimwe mu bihembo byagombaga guhembwa uwegukanye amarushanwa ya PGGSS, ubu abakunzi ba muzika benshi bibaza uko izaba iririmbitse, ururimi izaba irimbyemo amashusho yayo n’ibindi, uretse ko hari n’abibaza urwego izagezaho Tom Close dore ko ariwe muririmbyi w’umunyarwanda uba mu Rwanda ugiye gukorana indirimbo n’umustar ukomeye cyane ku rwego rw’isi nk’uko nawe yabidutangarije, abenshi rero bakaba bemezako Tom Close abonye amahirwe yo kuba nawe yamenyekana ku isi yose.

Igihe.com yegereye Abakunzi ba muzika batangaza icyo bateze muri iriya ndirimbo, ubutumwa baha Tom Close n’ibyo bamwifuzaho mukuyiririmba

Twizeyimana Saleh uzwi nka AC, ni umuririmbyi mu itsinda rya SKC ryamenyekanye cyane mu myaka ya 2002, yagize ati “ Aya ni amahirwe y’akatarabone Tom Close abonye ashobora kumugeza kure cyane, kandi numva ikinyarwanda kidakwiye kuburamo, yego azaririmbe n’izindi ndimi ariko ururimi rwacu ntirubure, kandi mugukora amashusho yayo bimwe mu biranga umuco wacu, idarapo  ntibizaburemo.

AC akomeza agira ati “ Tom Close azakore iyo bwabaga yerekane ko u Rwanda rufite muzika kandi dushoboye n’isi yose ibime kuko iriya ndirimbo izagera kure hashoboka nkurikije ubuhanga nsanzwe nzi kuri Sean Kingston, n’ibindi byose azumva bihesha ishema u Rwanda kandi bikarushaho kurumenyekanisha neza.

Kimwe n’abandi bakunzi ba muzika twaganiriye, Niyonshuti Marcel ni umunyeshuri muri Kaminuza ya ULK, yemeza ko n’ubwo ataririmba abaye ariwe ugize ayamahirwe yazashyiramo itorero rikamubyinira imidiho minyarwanda, Marcel Ati “ Ntekereza ko izindi byino zoze yazana ntagashya yaba yeretse isi, ariko hajemo nk’imihamirizo yaba n’iya mbere ku isi kuko uhuje iriya mi byinire y’abanya Jamaica n’intore n’abakobwa bacu mbona byabyara ikintu cyiza cyane.

Umukobwa ucuruza inite za telephone (M2U) ukorera mu mujyi wa Kigali utashatse ko tumuvuga izina yagize ati “ Ntabuhanga bwinshi kuri muzika mfite ariko nkunda Tom Close ku buryo ntabura icyo mubwira, niyo mpamvu mwisabiye ko yaza shyira nk’ibirango by’igihugu cyacu muhashusho y’iyo ndirimbo, akaririmba ikinyarwanda kandi azakoreshe amagambo ye bwite kugirango hatazagira abongera ku mushinja gushishura (kwigana)

Igihe.com yegereye Tom Close kugirango avuge kuri ibi byifuzo by’Abakunzi ba muzika agira ati “ Nibyiza ko bangejejeho ibyifuzo byabo bigaragara ko baba bankurikiranira hafi nange ibyiza muri byo nzabishyira mu bikorwa kandi banyihanganire ko ntababwira ibyo ngewe nateganije kuyishyiramo kuko naba nyibabwiye itarasohoka, bivuzeko ubwo bikiri ibanga, kandi nkuko yabidutangarije yizera neza ko iyi ndirimbo izamugeza kure.

Venuste Kamanzi